يا بنت ليجيت اصلي ما لش ومالي =لا اجيب لي عيد لا بعده ولا قبله
صلي لحالش وانا بصلي لحالي = اخاف قلبي هدب عينش يوجِّب له
واضيِّع اللي نويته باول وتالي = وتصير عيني الامام وعينش القبله
وش عاد تنفع صلاتي وانتي قبالي = لا قلت بدل الله اكبر حي ذا القبله
واعيد فرضي عشر مرات لو جالي = وفي كل مره هدب عينش يعرقب له
اللي لقتل الشجاع يسير مختالي = وان قيل له كم بتاخذ ؟ قال وش هبله !!
ما انلام لو قيل جن وصابه هبالي = وانتي جميع الخلايق فيش منهبله
تدرين وانتي بعيده / كنش ظلالي = طيفش يدورج وعيني بس ترقب له
ان قلت بنساش واعقد دونش حبالي = أقبل وقطع حبالي ثم عقد حبله
كنه حلف وين ما الد يتهيا لي = ولا حلف قال طرفك والله لانشب له
اجلس مع الناس لكن داله ٍ سالي = ولي عين كنها على السلهام منجبله
وجيه تملا المكان وناظري خالي = وان سولفوا تحلف ان اذني بلا طبله
الا لما جابوا اسمش لحت بعقالي = وفزيت فز بدوي ْ لسارقين إبله
وليشفت نظراتهم تبحث خفى احوالي =وكنها من الشك والتنغيز معتبله
سويت كني ازبط وضع دسمالي =وان قالوا اشفيك قمت الف واستبله
ادراش عن ناقلين القيل والقالي =ما ابغاه يدري بش اللي ما يحطب له
وابعد عن الناس خوف عيون عذالي =العاذل اللي سببه الكبد مندبله
في خايع ٍ فيه كن ذكراش همالي =وما غير طيفش معي من ربله لربله
كنه ايتمايل مع دندان موالي = ويرد ما قلت وانا ارد واطرب له
وقلبي من الشوق لا ميل معه مالي = وليتثنى يفز القلب يلعب له
من بن شوقي مبهر لاجله دلالي = والشعر مثل القدوع اللي يقرّب له
اجمع غرامش من عروقي بفنجالي = واسقيه فنجال دون الخلق يسكب له
يلعب على رمش عيني ويتثنى لي = وليتعب يفترش جفني واطبطب له
وليسرى شب ضو الشوق في بالي = يدفى على جمر حر ٍ ما هو بعبله
من كبر حبش غدى كنه اصغر عيالي = ما اغير اداريه واراعيه واحسب له
كتبت لش في غيابش ما برا حالي = يا كيف لو شفت زولش ويش بكتب له
كيف الشعر لا انتثر يشبه لشلالي = روح بقلب ٍ شجاع ٍ كم تزهب له
ولا الجمر كيف يحمي المبسم الحالي = اللي هماجه رحيق النحل ينسب له
ويا كيف برق الثنايا يشعل اشعالي = هو بس يقدح وشعري ينهمر وبله
وكيف الزهر من عبيره ينتشي الخال ِ = اللي يحرس الزهر لا احد ٍ ( يهوب له )
ويا كيف عود ٍ مع النسناس ميالي = من قال بان لش شبيه يقول يا خُبله!!
يا كوثر الحب يا ياقوت يا غالي = يا كيف انا في يمينش ما احسد الدبله
ويا كيف اوفي الصلاه وترفع اعمالي = وانتي قبالي وجفنش مرخي ٍ نبله
صلي لحالش وانا باصلي لحالي = يا بنت شوفتش تلعب فيني السبله