حارة المساطيل - عرض مشاركة واحدة - ديوانية المجلس للكتب( تحميل/ نقاش... مع كوب قهوة)

16-05-2008, 10:29 PM

خوش فكره

بسم الله نبدأ ..

كتب اعجبتني لسبب أو لآخر :
السجينة + دافنشي كود + جين اير + ثلاثية أحلام مستغانمي (ذاكرة الجسد/فوضى الحواس/عابر سرير) + سيدة المقام + سقف الكفايه + لا تحزن + حتى لا تكون كلاّ.

أجنبية :
A walk to remember <<-- قاتلة و أطلق من الفيلم
Message in a bottle
The guardian
كلهم للكاتب نيكولاس سباركس - (ممتعه بس حدها تقرينها مره وحده و خلاص .. شخصيا ما أحس الكتاب ممتع إلا إذا أجبرني أقراه مره ثانيه .. بالمناسبة/قراءة الرواية قبل الفيلم تبعها - إذا كان لها فيلم- .. تراه أحسن و أمتع و أشمل )

.
.

"فسوق" - عبده خال .. ودتس من يشب فيه .. كتاب كان سخيف جدا .. و حسافة الوقت اللي ضاع عليه .. شخصيا ما قريت غير فسوق ولا عادني قاريه لذا الآدمي بحيل الله ..

"حياة في الإدارة" - غازي القصيبي و هو الكتاب الوحيد اللي أشوفه أفلح فيه .. أعجبني جدا .. أما مطامره في الشعر .. أحس إنه خمبقة صراحة - مع احترامي - !

"نساء المنكر" - سمر المقرن .. سخيفة و جايبتن حيلها ع الهيئة .. واضح التحامل .. تقل ما صدقت تلقى شي تكتب عشانه رواية ! .. مثلها مثل "اختلاس" - هاني نقشبندي .. سطحية بعد و لا فيها شي يسوى القراية ..
بعض الأحيان لا قضيت من كتاب وانقهرت منه .. ودي أطق الكاتب .. أنتوا مثلي ؟

"سقف الكفاية" - محمد حسن علوان .. مؤلمة أدبيا .. و لكنها كقصة أحسها ترقل أو كأنها من القصص/ الروايات المعروفة نتيجتها مسبقا ! .. واضح تأثره بكاتبات / كتاب غيره .. مثل مستغانمي وكان قد اقتبس في روايته من حدى كتبها .. بالنسبة لي كقصة: "فاشلة ولا جاب جديد" .. ولكن راق لي الأسلوب الأدبي حد الدهشه <<-- كلام كبير يا أم جابر .. طبعا هناك بعض التجاوزات "الدينية/الأخلاقية" اللي ما جازت لي !

ثلاثية أحلام مستغانمي .. يعجبني أسلوبها و إن كان عليها بعض المآخذ مثل ما قلنا ع كتاب "سقف الكفاية" .. من وجهة نظري من بين ثلاثية مستغانمي .. "فوضى الحواس" هي الأفضل .. فكرتها مبدعة و تجيب الوسواس إن جاز التعبير

"طوق الطهارة" .. ما حسيت فيه ذاك الزود ! .. مع إنه أعجب صديقتي و ما قريته إلا ع مدحها له .. شخصيا ما أمدح بقراءته - وجهة نظر- ..

"سيدة المقام" - واسيني الأعرج .. عنده اسلوب مشوّق / ممتع .. ولكنه يتحمس و يحوقها في بعض المقاطع من ناحية الألفاظ .. !

- وجهة نظر -
وجود بعض المآخذ ع بعض الكتب / المؤلفين لا يعني إن الواحد يمتنع عن قراءتها .. لأن الفكرة إجمالا هي الإطلاع و ليس الإتباع ! .. و اللي يقرأ ما يوافقه فقط عزّ الله إنه يب يفحط في محله ولا راح يتثقف لين يموت <<-- بالعامي توصل أسرع

كتب ع الويتنق لست :

the wedding
the silence of the lambs
Doctor Zhivago
الأخيرة عندي من زمان .. روسيه مترجمه .. كاتبها هو بوريس باستيرناك .. أخذت جائزة نوبل .. و هي من أطلق قصص الحب بالعالم .. شريتها بناءا ع نصيحة صديقتي .. لا قريتها رجعت علمتكم .. أو اللي عنده فكره مسبقة يخبرني ولا عليه أمر.. بديت أقراها قبل فتره و صدعت .. يا عليهم أسامي
سلالم الشرق
ملائكة و شياطين
الحصن الرقمي <<- شكلي بهوّن عقب كلامتس ديجا
سيكولوجية الانسان المقهور <<- بديت فيه ولا كملته
مالكوم إكس "النصوص المحرمة"
الجريمة و العقاب
مائة عام من العزلة

كلهم من سنة الدبس عندي بس للحين ما كتب ربي أقراهم .. أي نصيحه ع الكتب اللي بالانتظار عطونا خبر .. لا هنتوا .. بعض الكتب شفت من يمدحها و إن شاء الله تكون ع مستوى المدح
تحيّة لصاحب الفكرة و المتابعين ..
و تراي متابعه و أحمّل كتب .. بس متعيجزه أعلق بعيد عنكم