ياللي تبي تعرف اسراري وعنواني=الحزن والضيق واللوعه عناويني
وان كان من جد يا بن الناس تبغاني=في كل لمة حزن يمكن تلاقيني
يكتبني الضيق واللوعات تقراني=والناي من شرهة احزاني يغنيني
أجامل الصبر والايام تعصاني=بالله قلي وش اللي معجبك فيني
فقير يوم ان عز النفس ما غناني=لو قلت للفقر عز النفس مغنيني
كم واحدا ما شتمته لجل ما عطاني=وكم واحدا ما مدحته لجل يعطيني
يقلقني الذنب لامنه تغشاني=يالله من الذنب والغفله تنجيني
ما هو بدايم يصير الساني حصاني=كم زلة من لساني صدق تشقيني
من صغر سني وانا هالحزن يبراني=واليوم عمري تعدنه ثلاثيني
صحيح ماني بمثل ابوي واخواني=رغم ان هقوات نفسي نوب تغويني
ما مد كفي لكفا ما تمناني=ولاسج رجلي بدربا ما يوديني
ما كذب لاكن اتجمل بعض الاحياني=يوم ان ها الكذب صاير شي روتيني
في ظروف ازرف عزيزا ما تناساني=وفي ظروف ادور مزرفني وناسيني
اعرف نبض الجفا في وجيه عدواني=واعرف نبض الغلا في اللي مواليني
والطعنه اللي تجي من صوب صدقاني=اقسى من الطعنه اللي من عدويني
كم مرت مات دمعي داخل اجفاني=وكم مرت اتفه الاسباب تبكيني
كذاب لو قلت شعري يوم ما شقاني=احيان يسرق منامي من جفن عيني
اكتب قصيدي عشان عيون خلاني=ومرات اجامل عشان ارضى محبيني
هذا اعترافي وانا ماني بندماني=ممكن ابصم او التوقيع يكفيني

من شاعر المليون جينا والملا نقطة عبور= من فوقها عدت قوافينا على مليون دار
مابينه وبين الشيم والمرجله ايات سور= الخيل مرباعه وهو للخيل والمرباع دار
رسمي جده ذاك صنديد الرجاجيل الغيور= الي لكف المرجله والطيب والعز انتصار

واجمع كلام فيه ما ينثني عزمي= الا جابها للشوق والود والطيبه
كبر همها وانا كبر همي= وعرفنا السهر والشعر قمنا نهريبه

صحى صوت الملام وكل عبره في بيوت الطين = تعانق مجد بابل والسحاب يصافح ترابه
لمحت الفجر مر وفي جيوبه دبله وحرفين = رمتها الشمس في وجه الظلام وشقق ثيابه
وغارت في الحشا خيل الشعر يا عادل الشاهين = وسرت في كل عرق سيوف عز وصيحه ولابه
يشوش الحرف مثل الفارس اللي ينطح الغازين = وقصيدي فيه من صدق البياض وثورة أعصابه
ملامح طفل ضاع بكلمتين وردد أمي وين = كسر صمت الجبال الشامخات وحطم ألعابه
تثور بداخله فزعات إبن مهذل وإبن حثلين = وعزاوي يام لي طار الفشق والنار شبابه
سرى ما بين واحات النخيل وضفة النهرين = ونادى للسهول ووادي الريحان وأعشابه
سلام الله على بغداد في وقت العسر واللين = لو يشح الزمان بنفحة التاريخ وأطيابه
على أطول ضلع في صدر الغياب أبني لها بيتين = وألوح للحمام اللي هجرها وأجمع أسرابه
أصب الغيم يا عادل ولو طال السهر والبين = تطمن والله إن الحق له لابه وطلابه
حبل سنجار لو نادى وردد يا صلاح الدين = نبت في كل ذرة رمل درع وسيف وعصابه
تحزم وأرفع البيرق يا عادل وأزهم القاصين = وصوتك ما ذبل يوم الليالي السود مرتابه
يسوقه ساسك الطيب ونخوة ربعك الوافين = مقابيس الوغى شمر نهار الهوش حرابه
يقولون البدو علم الحيا والطيبين يبين = وأنا أخيل البروق وكل ضامي يشعب ركابه
أمانه وصل عيوني يا عادل ديرة الغالين = وبلغ صبحها المبتور يطوي صفحة كتابه
وعلمها عن آخر سالفه للجرح ما السكين = وطمن كل مسجد في ثراها ضج محرابه
عزاوي الطفل فينا لا وصل راس اللهب للدين = تهزم ألفين ظالم وألف طياره ودبابه
صبرنا لين فاض الكيل بين الشك والتخمين = وحنا روس قوم ما تهاب الموت وأسبابه
خلاص من الظلام اللي تمادى وأستحل العين = خلاص وكل درب لجنة الفردوس حيابه

انا ما شفت شي يهين قلب ويتعب الانسان= مثل صدة حبيب يجرحك داري ولا يبالي
حبيبي ما زرعت الا شجون الحزن فالوجدان=حبيبي ما جنيت الا حزن قلبي وعزالي
دخيلك لا بعيت تمر في بالي وانا سهران= تاخر لين انام وبعدها تعال في بالي
قسم بالله شفني فالغياب استجدي النسيان= ابانثر ذكرياتي للسنين ولا تهيالي
تركتك في تهاتيه الغياب ولوعة الحرمان= واشوفك وين ما يممت وجهي صرت تبرالي
مدام ان السنين تعلم الرابح من الخسران= اجل وشوله ارخص ضحكتي لعيون عذالي

راكب اللي كل ما هب الهوى تسمع صفيره=لا تنحر للهبوب ومقدم الليل امتداني
والله إنه يبعدك عن دار ويوصلك ديره=منوة اللي دقها قوس تحت حدب المحاني
ما اشتغل في مسجله نجوى ولا غنت سميره= يشتغل فيه السديس يرتل السبع المثاني

لا تحبس الدمعه وهي ودها تطيح=يمكن تشيل من الكدر ماامتلابك
النفس عرا لا كتمها الهوى تصيح=وتشق جيب انفاسها من عذابك
يخي تعبت انثر خطاياك بالريح= وعن زلتك اسد بابي وبابك
اشعل شموع افراحنا والمصابيح=ولو ينتثر شيبك ارجع ثبابك
تكفى ابي لفراقنا أي توضيح=عشان لامن جيت طلق هلابك
والحين جيت وللخطا جبت تصحيح=ماظنتي عذرك يبين غيابك
جابك علي درب الهوى دون تصريح=ويرجعك درب الهوى يوم جابك

لعل الوسم يمطر على ديرة الوافين=واشوف البروق تلوح والقاع ممطوره
ديارٍِ غلاها له بوسط الضلوع سنين=ينادي وعشب فياضها فاحت زهوره
وانا جيت اجدد حب راكان بن حثلين=لاهل سربةٍ بالخيل والطيب مشهوره
سرى يطوي فجوج الخلا والعرب ممسين=يسوقه غلا شمر وتقدير اخو نوره
عسى الله يلوم اللي يلومه ليوم الدين=ما دام القلوب بحب الابطال مفطوره
قرينا تواريخ العرب والعلوم تبين=وكم بارقٍ ليل الدجى ما حجب نوره
على العز يسري والحقايق تسر العين=مثل لمعة سيوفٍ بالامجاد مشهوره
من فعولها ذكر الطنايا يهز الصين=ونهار الشدايد لا اعتزوا زعزعوا سوره
سلامي عليهم في العسر واليسر واللين=اقوله وانا روحي على الوصل مسروره

يا حلوتي نامي على كف الاحلام= وانا لي هموم الغرام وصخها
اسهر على صدر التباريح وانام= واصحى على نار الجروح وحطبها
لا هيجنت شعر كتبته له العام= عسى جديدي ما يطوله عتبها
والشاعر الي ما سرق لب الاقلام=ودك يموت وضيقته ما كتبها
تنساه صفحاة الليالي ووالايام= ما تعشقه بيض الورق لو خطبها

كانت فريدة حسن فعلا فريده=يرقص لها قلبي من الجال للجال
كنت اعتذر يوم الليالي عنيده= واقول باكر ينقلب حالي احوال

يا عم وش عندك على سقاية الحب والغرام=القلب واحساسي وانا تهنا معا دوامتك
خليتنا نمشي على درب البله والانفصام=نحب من حبك ونكره بالهوا من من صامتك
سيد غنج لا شافك الخافق تهندم لك وقام=تعال في قلبي وقلبي لايق لفخامتك
حبك عبوه ناسفه وقلبي مثل جيش الظلام=يوم انتصف درب الهوى غدى وسط غمامتك
تشبيه عابر بس مثل الضرب من تحت الحزام=فكره ولا تقدر تعديها الا من حامتك
عن عاذلين القلب يا قلبي ابي منك كلام=لاجيت اسكر جامتي يا قلب سكر جامتك

ازرعك في تربة الخفاق يا عمري حروف=لين اشوفك تنبت واقرى حروف اسمي عليك
في شراييني تمد جذورك وتحيا وتشوف=كل ركن بداخلي كاتب على جداره ابيك
ارتجي شوفتك واحزاني على صدري وقوف=كل حزن يصبر الثاني ويحلف ما يجيك
المصيبه لا وفت يدي وخانتني الكتوف=وصرت ادور لي ولا القاني سوى في راحتيك
صرت اللملم لك ضلوعي يوم حرص ويوم خوف=لاتبور التربه الي ساكنتها وجنتيك
اوزرعك في تربة الخفاق يا عمري طيوف=لين اشوفك تنبت واقرى طيوف اسمك عليك

الشعر زفره من معالي قالنفوس الزاخره=االي بها ارض الفكر خصبة خيال ومثمره
الشعر بندق وففشقه للضيق مري ذاخره=اجيب امره اكبر واجيب مره اصغره
كن اللقا غايه وهو دايم يغيب وينحره= من يوم غاب وصورته في وسط قلبي داخره
حاك الغلا ارض وجعل للارض غيمه ممطره= ابا انتظر الين ياصل هالغياب لآخره

حي راسك يا وريث المجد يا ساس العروبه=يا سليل الي عشق نجد وسرى واطلق خصبها
من وقار السيف تاخذ هيبتك في كل نوبه= فيك من طيب البحور وفيك من ثورة غضبها
يضحك البراق في كفك وهي تمطر عذوبه= كنها غر السحاب الي يغازل سودة ابها
والجنوبي ساعة الشدات يفخر في جنوبه= لا اعتزى بالضيق والغتره على راسه عصبها

يا حلوها من فمك تصبح على خير=مابعدها غير الصبر والتفاول
ابا انتظر بكره ولا ادري وش يصير = ولو قلت لي اصبر ابا اقول احاول
خذني وانا ما الد بعدك للغير= بين الرجا والياس صعب التداول
لا هب نسناس المحبه بك عصير=قلبي غدا صحرا وذكرك جداول
وافك عن صدري عليك الازارير =كنك مع الانفاس سهل التناول
وش بعدها من فمك تصبح على خير=مابعدها غير الصبر والتفاول

امر بسكة الموتى غري ب وهالعمر معدود= واوقف دونها كن بيني وبين المنايا باب
ياسكان القبور الصامته لو الحياه تعود= وقفنا درع لسهوم المنايا ونفتدي برقاب
ولاماتت صفاتي هالشباب الي يكابر عود = عزاه من البياض اللي* ‬فهو ستر السواد وشاب
مسا البارح جلست ارقب من ارحام الشعر مولود= اهندم له محابير وربيع المحبره يرتاب
اشب النار بعيون المكان الي عليه جنود= وامز من المشاعر والفكر لا من نخيته جاب
حكاوي كنت اظن احساسها ما بللته النود= اثاري احساسها نود يبلل خاطري تسكاب
يا عمي لا تذكرني ترى دمع الرجل منقود= اخا فاطيح مع دمع يمن عيوني على المحراب
هنا كنا وهنا نبقى وهنا درب القيم مسدود= هنا صار الوجع يقفي وانا لبعض الوجع طلاب