قعدت افكر في اللي قالته ..ساعات اقول لا..لا..مش ممكن..وساعات اقول والله مهيب شينة <---- وش اللي مهيب شينه؟؟ انك راعي نخوه ومروة ..والا انك تصير جد عيال اخواتك فتامر وتنهاهم ؟؟ ايضا تذكرت بنت عمتي اللي حبيتها ..تذكرت ابوها لابارك الله فيه..فكان كل ماجيتهم قام يذب علي حتسي يجيب المر في التسبد ..ماغير يقول :ايه عيال اخوي مامثلهم ..شهادات..ووظايف زينة..وبناتي مالهن الا عيال اخوي..قطعت هوجاسي وصرت اقول : ايه..لا..مدري ..بس..خلاص..الله واكبر على هالعيشة اللي عسى ما انظل عليها ..وعلى طول جا في بالي مقاطع الممثلين الكبار اللي يضحون بمستقبلهم علشان اخوانهم ..فقررت إني ارضخ للأمر الواقع ووافق على عرس أم راشد علي ..فمايندرى يمكن تضحك لي الدنيا عقب ماتفّلت في وجهي ..ويمكن القى عند أم راشد حنان الام اللي أنا فاقده ..

تقدمنا لام راشد وكان من ثنايا كلام ابوي ان الحريم الطيبات ايسرهن مهرا.. أم راشد بينت : ان المرأة هالايام تشري الرجال اللي ونعم شرى .. وهي ماتبي مهر .. ولاتفكر في الامور المادية .. ولاهيب اصلا في حاجة فلوس بقدر ماهي بحاجة الى رجال يسترها ..فمثل ماقال المثل : ظل راجل ولا ظل حيطة واردفت قائلة : ان مافيه مانع اني احط المهر مؤخر من باب الاحتياط .. شهقت وتلعثمت يوم سمعت بالمؤخر ,, فغمزت لابوي يعني هوّنا .. لكن ابوي اقنعني ان المرة مطرفه وقال لي هامسا : لاتصير مثل اللي قالوا له دوك رزق وقال مامعي ماعون ..ونغزني مع شاتسلتي وهو يقول يا الرخمة لاتدفق نعمتك بيدك..فحنا محنب طالعين من هالمتسان الا يا انت المعرس والا أنا .. بعد ماسمعت كلام ابوي غليت أم راشد عندي .. <---- سبحان الله مايغلى الشي عندنا الا اذا درينا إن عيون الناس عليه وافقنا على كلش ..وحددت أم راشد موعد العرس لنكون شريكين في هذه الحياة..أنا بمجهودي وهي بفلوسها ..

جت ليلة العرس ولبست بشت بيج كنت شاحذه من واحد ..عقب ماحلفني اني ما أسحبه في الارض ولا الزّ به الجدران..وانتبه له من باب السياره لياني اصك عليه.. واني ما آكل ولا اشرب الا وانا فاصخة .. مرت علي ام راشد بسواقها ووصلتني لفلتها .. وعندما دخلنا غرفتها قالت لي : هاه وش معي منك ؟؟انت أسد والا من جنبها ؟؟ لا والله الا اسد ونص .. فسكرت اللمبات وهي تقول طيب ورّنا جوّداك يا المملوح .. بصراحه تحمست مهوب من شي ..بس علشان اثبت وجودي ليس الا .. وصرت اتلمس طريقي بحثا عن فريستي <----- صدقت اني أسد .. وبينما انا اخابط في هالظلما دحجت رجلي في كرسي التسريحة ..مما خلاني اتعكرف وادبج على خشتي ..فلما تباطتني بعلتي اذ بها تصفق بيديها وتطلع صوت مثل صوت الظاطور ..فقلت يامره مانيب يمتس ..رجلي انجرحت ..تعالي احزميها ومبارك ..

مرت أيام ولم احس إني في شهر العسل ..وبصراحة مانيب انبسط الامع بنات وعيال زوجتي ..لاني احس ان ثقافتي وتفكيري ولهجتي مقاربة لهم ..فإذا جلست معهم معد ودي اقوم اطلع لغرفتي بل تحام تسبدي الى مني ذكرت وش بيكون مصيري في غرفة ام راشد ..ويضيق صدري وتخنقني العبرة الى مني شفت عيال زوجتي يقولون لحريمهم : يا الله مشينا..فأقول في نفسي :
احدن يلاعب لابسات الخلاخيل @@@ واحدن عجوز شاف منها المضرة
وش تبوني اسوي ؟؟ فمفاصل أم راشد مجيمة وان تحركت طلعت صوت تسنه فرامل سيارات البلدية ..حتى جيراني صاروا يدرون عن دعوانا ..فدائما ما يتهامسون بيناتهم..اللي يقول : البارح سمعنا صوت سيارة البلدية بدري ..واللي يقول : ماش سيارة البلدية لها كم يوم ماسمعناها !! شكلهم ماخذين اجازة !! للأسف ما ارتحت في زواجي ولا حسيت بالرومنسية اللي يتكلمون عنها المتزوجين !! فزوجتي ترقد مبتسره وتقوم مبتسرة واذا قامت مهيب تدعيني اصفّر مثل العالم ..الا بالقوة تبيني اتقهوى معها ..وربي لو استمر على هالحالة ابأ اصير تسني ابو مية سنة ..فمهيب بعيدة ان دخلت دورة المياه ما افتح اللمبة ولااصاك الباب ..وادلي اتنحنح الى مني بغيت اتوضا ..بل ربما اطلع للشارع بثوب بدون سروال..وماارقد الا وعند راسي رادو

هيّاها وحيدة ربها اللي رحت مع أم راشد للسوق للسوق ومن عقبها حرمت تدخل للسوق معي ..فاللي اذكره أن حنا مرينا محل لانجري وطلبت منها ندخله ونشوف وش عنده...فكنت احلم ان زوجتي تديّر عندي بهالملابس كي اتمقلها..بس خسارة ما ان زلفت رجلها عتبة المحل الا وقالت : اعوذ بالله وش ذولي يبيعون !!وش هالخلاقين المشققة !!والله اللي يضحكون على هالعالم .. من هالمهبول اللي يشتري منهم ؟؟!! المشكلة ان الخلق اللي عندهم مايجي ولا ربع متر..فمدري وش مكلفهم يوم يبيعونه بهوات دراهم !! طلعنا ورحنا محل ثاني..وبينما كنت اقلب في بضاعة المحل واسأل بكم هذا ؟؟وهل فيه مقاسات من هذا ؟؟ و اذ بزوجتي تناديني بس ماكنت منتبه لها لاني كنت لاهي ومندمج مع بعض البلايز والتنانير مما خلا راعي المحل يتلقف ويقول لي : هيه شف امك تناديك وانت مطنشها ماغير تدور لزوجتك لبس !! التفت ادور أمي واذ بزوجتي قبالي وهي حايمة تسبدها ..تلفّت ادور امي لكن مالقيتها..قلت خل اتصل عليها : الو هاه يمه وينتس فيه ؟؟ ردت وقالت : عسى ماشر وين اباصير بالله عليك فيه !!هذا أنا منسدحة في المضلة اسولف مع الشغالة .. فالتفت على زوجتي وقلت غريبه أجل وش بلا راعي المحل يقول شف أمك تناديك!!قالت: اقول امش معي والا مشيت بالحالي .. تصدقون الى يومكم وانا مدري وش بلا راعي المحل يقول لي هالكلام ؟؟ .. للاسف بعض البنات الخساس ماخلوني في حالي ..فبعضهن يتصلن علي ويتميلحن بالكلام ..اللي تقول ياسفابك على هالعجوز.. واللي تقول والله انك مالقيت من يقدرك صح .. وأنا مانيب اعطيهن وجه .. على اني بغيت ارتخي شوي لوحدتن منهن لأنها صارت تسمع لي فأنا محتاج فقط من يستمع الي.. فصرت افضفض لها..ولا اخفيكم سرا فهي لعنبو بليسها عطتني من هالحتسيات اللي تحلي الريدز المر ..عطتني من هالحتسيات اللي متعطش لهن قلبي قبل أذاني ..هالحتسيات اللي أنا محروم منهن ..لكن يوم ذكرت ان الدنيا مهيب طويلة وان الدعوة فيها سمعه لي ولاهلي ولجماعتي تعوذت من ابليس وقطعت هالطريق ولا فتحت له مجال أبد ن البته ..وقلت مهوب مبرر للي ماتهنى في زواجه انه يبحث عن طرق أخرى غير شرعية ..حتى ولو كانت الدعوه مجرد كلام رومنسي وسعة صدر..وقلت اللي تعزني وتقدرني وتحترمني صح ماتسمح لنفسها انها تقول لي كلام ماتقوله الوحدة الا لزوجها ,, خصوصا ان حنا يا الرجاجيل قلوبنا رهيفة وعواطفنا جياشة ونشوف بقلوبنا اكثر مما تشوف عقولنا ..

فكرت في طريقة تخليني اتأقلم مع الوضع اللي انا فيه..فبعد جهد جهيد اهتديت الى طريقة جهنمية وذلك عندما التقيت بزوج خالتي الذي ربما رأى ان الحزن أخذ من وجهي ماأخذ ..( فكان راعي خبرة في الحياة )حيث قال لي شف وانا اخوك : ان تسان صيدك ان حرمتك عجوز فترى كل حريمنا كرب ..يعني مهوب انت لحالك اللي تعاني ..وأنا يامحاتسيك معرس على شيفة غلعل حتى القرد مايشتهي يناظرها لكن يا الله من فضلك عندي منها شلقة بزور وعايش معها على احسن حال .. فقيت كشرتي وقلت وشلوووون ؟؟!!! غمز لي وقال احمد ربك ان الله انعم عليك نعمة تغميض العيون والتخيل .. قلت كيف ؟؟!! قال اجل وش تحسب.. ثم اقفى عني وهو يقول لوكلامي مهوب صحيح تسان ماشفت ولا واحد كمل عرسه اسبوع .. فكرت في كلامه وقلت : مافيه اخس من تجربه .. فأخذت اقلبها في راسي ..هذه الليلة من سأتخيل ام راشد ؟؟ مافيه احسن من فاتن حمامة لا لا بل نجلاء فتحي ..تدري خلها مرفت أمين .. ثم ماش كثرن علي وصرت في حيرة معد ادري وش أبدي ووش اخلي ولكن سرعان ماخلت الساحة للسّندريلا سعاد حسني فهي بمجرد ماجت في مخيلتي الا وكرشت كل ابو الموجودات عن بكرة ابيهن .. حطيت في بالي إني هالليلة خلاص ابقابل سعاد حسني ..وقلت لازم استعد لها اللقاء بما يليق به ..فرحت لم صيدلية في الشمال علشان مايعرفني احد ودخلت وانا متلطم فلما وجدت الصيدلية مليانة أوادم قلت يادكتور لو سمحت ابيك على في كلمة راس ..فلما صديت به في القرنة قلت : بيني وبينك والكلام للجميع ولايدري أحد : أنا الليلة ابقابل وحدة عزيزة علي وابي شي يرفع الراس ..هز الدكتور رأسه وهو يقول منا فاهم عليك فغاب لحظات ثم خذ له علاج وصار يصايح على تعال هنا وخد الفياقرا فماكان مني الا نحشت وانا اقول الله يقلع هالمصيري صدق انه فضيحة .. رحت لصيدلية ثانية مافيها أحد وجاءني بالمطلوب وهو يقول :هاض يازلمة كافي إنو يخليك سنافي ..فحاسبته وانا اقول هاه ترى هذي سعاد حسني مش حي الله .. فغادرته وعلامات الترقيم اللي درسناها واللي مابعد درسناها واللي محنب دارسينها كلها فوق راس الصيدلي